काठमाडौं, २५ असार । सरकारले नेपालको विषयमा भ्रामक र आपत्तिजनक समाचार सम्प्रेषण गर्ने मिडियामाथि राजनीतिक र कानूनी उपचार खोज्ने प्रष्ट पारेको छ ।
आज आयोजित नियमित पत्रकार सम्मेलनमा सरकारका प्रवक्तासमेत रहनुभएका अर्थ र सञ्चार तथा सूचना प्रविधिमन्त्री डा. युवराज खतिवडाले यस्तो जानकारी दिएको हो । उनले पत्रकार सम्मेलनमा भारतीय मिडियामा नेपालको विषयमा आएका समाचारको सरकारले भत्र्सना गर्ने बताए ।
‘सञ्चारमाध्यमहरु, चाहे नेपालका हुन वा विदेशी, सबैले स्वच्छ, स्वस्थ र पारदर्शी ढंगले समाचार सम्प्रेषण गर्नुपर्छ भन्ने मान्यता हाम्रो छ । दुर्भावना फैलाउने, चरित्र हत्या गर्ने, मानमर्दन गर्ने समाचार तथा विश्लेषणको सरकार भत्र्सना गर्छ । सरकारले मिडियालाई प्रतिवन्ध लगाउनुभन्दा आफू अनुशासनमा बसोस भन्ने चाहेको छ । कुटनीतिक माध्यमको पनि परिचालन गर्नुपर्ने हुन्छ,’ भारतीय मिडियाबारे सोधिएको प्रश्नमा मन्त्री खतिवडाले भने । भारतीय टिभी च्यानललाई रोक लगाउनुपर्ने आवाज उठिरहेको छ, सरकारले के गर्छ भन्ने प्रश्नमा मन्त्री खतिवडाले यस्तो जवाफ दिएको हो ।
भारतीय टिभीबाट प्रसारित समाचारबारे कानूनी उपचार खोज्ने उनले बताए । ‘हाम्रो राष्ट्र, राष्ट्रियता र नेपालीहरुको स्वाभिमानमा आँच पुर्याउने समाचार सम्प्रेषण नगर्न हामी स्वदेशी र विदेशी सबै मिडियालाई आग्रह गछौं ।’ उनले भने, ‘दुर्भावना फैलाउने, चरित्र हत्या गर्ने, मानमर्दन गर्नेको पछाडि कानूनी उपचार खोज्नुपर्ने कुराहरु पनि हुन्छन । राजनीतिक र कानूनी दुवै उपचार खोजिने मन्त्री खतिवडाले बताए ।
