पर्वत, २५ साउन– गण्डकी प्रदेशका मुख्यमन्त्री पृथ्वी सुब्बा गुरुङले प्रदेश सरकारले स्वास्थ्य क्षेत्रको पहुँचलाई आधारभूत बनाउँदै गण्डकी प्रदेशको स्वास्थ्य सेवालाई अन्य प्रदेशको माझमा उदाहरण बनाउने दावी गरेका छन् । पर्वत अस्पतालमा सुरु भएको मिर्गौलाको निःशुल्क डायलासिस सेवाको शुभारम्भ गर्दै उनले प्रदेशका नागरिकलाई आधारभूत स्वास्थ्य सेवाको पहुँचमा जोड्न ४ कुराहरूमा विशेष जोड दिइएको र त्यसबाटै प्रदेशको स्वास्थ्य अवस्था बलियो बन्ने बताए । स्वास्थ्य संस्थामा जनशक्तिको उपलब्धता, भौतिक संरचना निर्माण, स्रोत र उपकरण तथा चिकित्सकहरूमा दिइने ऊर्जाले नै प्रदेशमा स्वास्थ्यको अवस्था बलियो पार्ने गरी प्रदेशले काम गरिरहेको उनको भनाई छ ।
जिल्ला अस्पतालहरूलाई राष्ट्रिय मापदण्डमा लैजाने गरी काम हुनुपर्ने र अहिले पनि डक्टरको दरबन्दी एकातिर काम गर्ने अर्कोतिर भइरहेको बताउँदै मुख्यमन्त्री गुरुङले गण्डकी प्रदेश सरकार मातहतका स्वास्थ्य संस्थाको सेवालाई प्रभावकारी बनाउन जनशक्ति ब्यबस्थपन र भौतिक पूर्वाधार विकासका लागि प्रभावकारी काम भएको उल्लेख गरे ।
गण्डकी प्रदेशकी सामाजिक विकास मन्त्री नरदेवी पुनले गण्डकी प्रदेश सरकारले जनता सरकारी अस्पतालमा आउँदा निराश भएर फर्कन नपर्ने गरी सेवा र पूर्वाधार विकासको काम गरिरहेको बताईन् । नागरिकले सेवा लिने भएकाले सरकारी अस्पतालमा उत्कृष्ट सेवासहित स्वास्थ्यकर्मीको बोल्ने शैलीमा पनि मिठास हुनुपर्ने उनको भनाई छ ।
डायलासिस सेवा सुरु भएसँगै पर्वतका मिर्गौला सम्बन्धी बिरामीले डायलासिस गराउन पोखरा जानुपर्ने बाध्यता अन्त्य भएको छ । पर्वत अस्पतालमा दैनिक ९ जनाले तत्काल सेवा लिन सक्ने गरी सेवा सुरु गरिएको छ । डायलसिस सेवा सुरु गर्न ४ वटा मेसिन जडान गरिएको छ । एक महिना सम्म पहिलो सिफ्टमा ९ जनालाई सेवा दिन सक्ने र जनशक्ति थप भएमा १८ जनालाई सेवा दिन सकिने पर्वत अस्पतालका मेडिकल सुपरिटेन्डेन्ट डा। शिशिर देवकोटाले जानकारी दिए ।
– ढोरपाटन
