काठमाडौँ । सत्तारुढ नेपाल कम्युनिस्ट पार्टी(नेकपा) केपी ओली समूहले आज शक्ति प्रदर्शनसहित नारायणहिटी अगाडि आमसभा गर्दैछ ।
दिउँसो १२ बजेदेखि दरबारमार्गस्थित नारायणहिटी संग्रहालयको गेटअगाडि हुन लागेको आमसभाका लागि देशैभरबाट कार्यकर्ता काठमाडौं ल्याइएको छ।
आमसभालाई प्रधानमन्त्रीसमेत रहेका नेकपा अध्यक्ष केपी शर्मा ओलीसहित तीन जना नेताले सम्वाेधन गर्ने छन् । सभालाई उपप्रधानमन्त्री ईश्वर पोखरेल र गृहमन्त्री रामबहादुर थापा ‘बादल’ ले सम्वाेधन गर्नेछन् ।
कार्यक्रमको पूर्वसन्ध्यामा युवा संगठनले बिहीबार साँझ काठमाडौँमा मार्चपास गरेको थियो ।
१६ ठाउँबाट जुलुस
आज काठमाडौंका १६ स्थानबाट जुलुससहित कार्यक्रममा सहभागी ल्याइने तयारी गरिएको छ।
त्यसअघि नै युवासंघले जुलुस निकाल्नेछ। सोही जुलुसका लागि ३ हजार स्वयंसेवक परिचालन गरिएको केन्द्रीय सदस्य महेश बस्नेतले जानकारी गराए ।
