अमेरिकामा कोरोना सङ्क्रमण १८ प्रतिशतले बढ्यो

-


     मर्दी न्युज    
     ७ मंसिर २०७८ मा प्रकाशित


वासिङ्टन । संयुक्त राज्य अमेरिकामा अघिल्लो हप्ताका तुलनामा यो हप्ता कम्तीमा पनि १८ प्रतिशतले कोरोना भाइरसको सङ्क्रमण बढेको देखिएको छ । 

यहाँका स्वास्थ्य अधिकारीहरुले जनाएअनुसार यहाँ अघिल्लो हप्ताका तुलनामा यो हप्ता बढेका सङ्क्रमितको सङ्ख्या १८ प्रतिशत पुगेको हो ।

यहाँको सेन्टर फर डिजिज कन्ट्रोल एन्ड प्रिभेन्सन, सिडीसीले जनाएअनुसार यहाँ हरेक दिन कम्तीमा पनि ९० हजार जना सङ्क्रमित हुने गरेका छन् । सो सेन्टरद्वारा उल्लेख गरिएअनुसार पछिल्लो २४ घण्टामा कोरोना भाइरसबाट यहाँका ९२ हजार ८०० जना सङ्क्रमित भएका छन् ।

उनीहरुका अनुसार यहाँ अहिले पनि दैनिक कम्तीमा पनि ९० हजार जनामा यो भाइरसको सङ्क्रमण भेटिने गरेको छ । अघिल्ला सात दिनभन्दा यो हप्ता यहाँ ९० हजारको हाराहारीमा यी सङ्क्रमित भेटिएका छन् । 

तर सोमबार भने यसमा वृद्धि भएको हो । त्यसै गरी सो सेन्टरको तथ्यांकअनुसार यहाँ हरेक दिन अस्पताल भर्ना हुनेको सङ्ख्या पनि बढ्दै गएको छ ।

स्वास्थ्य अधिकारीहरुका अनुसार यहाँ प्रत्येक दिन कम्तीमा पनि ६ प्रतिशतका दरले अस्पताल भर्ना हुने नागरिकको सङ्ख्या बढिरहेको छ । पछिल्ला दिनहरुमा यसरी सङ्क्रमित तथा मृत्यु हुनेको सङ्ख्या नै बढ्दै गएको देखिएको हो ।

यहाँ कोभिड विरुद्धको खोप लगाउने सङ्ख्या भने धेरै छ । उक्त सेन्टरका अनुसार यो खोप नलगाउने व्यक्तिलाई लगाउनेलाई भन्दा सङ्क्रमण सर्ने ६ गुणा बढी डर हुन्छ ।

त्यसै गरी खोप नलगाउने व्यक्तिको मृत्यु दर पनि लगाउनेको भन्दा कम्तीमा पनि १४ गुणा बढी मृत्युको सम्भावना रहन्छ ।