काठमाडौँ । यातायात व्यवस्था विभागले सार्वजनिक यातायातको भाडा बढाएको छ।
विभागले पेट्रोलियम पदार्थको मूल्य बढेसँगै वैज्ञानिक भाडा समायोजन प्रणालीअनुसार स्वचालित रूपमा अन्तरप्रदेशमा चल्ने सार्वजनिक यातायातको भाडादर वृद्धि गरेको हो ।
यातायात व्यवस्था विभागका अनुसार यहि साउन ३१ गतेदेखि लागू हुनेगरी सरकारले न्यूनतम ४ प्रतिशतदेखि अधिकतम ६ प्रतिशतसम्मले भाडा वृद्धि गरिएको हो ।
जसअनुसार यात्रुवाहक सवारीमा ४.७० प्रतिशत, पहाडी बाटोमा सञ्चालन हुने मालवाहक सवारीमा ६.१५ प्रतिशत र तराईको बाटोमा सञ्चालन हुँदै आएको मालवाहक गाडीमा ६.८३ प्रतिशतले भाडा बढेको छ।
सार्वजनिक यातायातको भाडा समायोजन गर्दा आधार मानिएको इन्धनको बजार मूल्य ५ प्रतिशत वा सो भन्दा बढीले बढेमा वा घटेमा विभागले अभ्यास गर्दै आएको वैज्ञानिक भाडा समायोजन प्रणाली अनुसार स्वचालितरुपमा अन्तर प्रदेश सार्वजनिक यातायातको भाडा बढ्ने वा घट्ने व्यवस्था छ ।
