काठमाडौँ । नागरिक उड्डयन प्राधिकरणले रामेछाप विमानस्थलका प्रमुख र तारा एयरका दुई पाइलटलाई निलम्बन गरेको छ । राष्ट्रिय सुरक्षा मापदण्डको उल्लङ्घनको कारण अर्को सूचना नभएसम्मका लागि उनीहरूलाई निलम्बन गरिएको प्राधिकरणले जनाएको छ ।
निलम्बनमा पर्नेहरूमा रामेछाप विमानस्थलका प्रमुख अशोक थापा, तारा एयरका वरिष्ठ क्याप्टेन सन्तोष शाह र अर्का क्याप्टेन सञ्जीव श्रेष्ठ रहेका छन् । उनीहरूबिच शुक्रवार बिहान रामेछाप विमानस्थलमा युनिफर्म लगाएकै अवस्थामा कुटाकुट भएको थियो । दुवै क्याप्टेनको लाइसेन्स निलम्बन गरिएको हो ।
कुटपिटको घटनापछि श्रेष्ठले जहाज लिएर लुक्ला पुगेका थिए । घटनापछि पनि श्रेष्ठलाई उडान अनुमति दिएका कारण विमानस्थलका प्रमुख थापालाई पनि निलम्बन गरिएको प्राधिकरणका उपप्रबन्धक एवम् सूचना अधिकारी ज्ञानेन्द्र भुलले जानकारी दिए । घटनाको अनुसन्धान पुरा नहुँदासम्मका लागि निलम्बन गरिएको उनले बताए । भुलले भने, ‘झगडा पछि उडान अनुमति दिन हुँदैनथ्यो । अनुमति दिएकोमा र थप अनुसन्धान गर्नुपर्ने भएकाले थापालाई पनि निलम्बन गरिएको हो ।’
