गण्डकी प्रदेशका मुख्यमन्त्री सुरेन्द्र पाण्डेले आफ्नो प्रदेश स्वास्थ्यको हब बन्ने चरणमा रहेको दाबी गरेका छन् ।
गोरखामा निजी स्तरबाट निर्माण भएको अत्याधुनिक सुविधा सम्पन्न एनपीआइ गोरखा अस्पतालको सेवा शुभारम्भ गर्ने क्रममा उनले यस्तो बताएका हुन् ।
मुख्यमन्त्री पाण्डेले गोरखामै सय शैय्याको सुविधा सम्पन्न अस्पताल निर्माण भएपछि चितवन, पोखरा र काठमाडौँ जानुपर्ने बाध्यता अन्त्य भएको जिकिर गरेका छन् ।
ठूलो लगानीमा पहाडी जिल्लामा अस्पताल सञ्चालन गरेको भन्दै चितवन र गोरखाका व्यवसायीलाई धन्यवाद दिँदै उनले निजी क्षेत्रलाई लगानीको वातावरण बनाउन प्रदेश सरकार तयार रहेको बताए ।
साथै, उनले मुख्यमन्त्री पाण्डेले स्वास्थ्य सेवा सबै जनताको पहुँचमा पुग्नुपर्ने पनि जिकिर गरे ।
चितवन र गोरखाका व्यवसायीहरू मिलेर ५५ करोडको लागतमा एनपीआई गोरखा अस्पताल निर्माण गरेका हुन् ।
२०७७ साल माघ ५ गतेबाट निर्माण शुरु गरेको अस्पताल गतवर्ष नै निर्माण सम्पन्न भए पनि भवन पास ९निर्माण सम्पन्नताको प्रमाणपत्र० प्राप्त हुन समय लागेका कारण सञ्चालनमा ढिलाइ भएको थियो ।
९ रोपनी क्षेत्रफलमा फैलिएको अस्पतालमा बहिरंग र अन्तरंगका साथै छुट्टाछुट्टै क्याबिन समेत निर्माण गरिएको छ ।
जिल्लामा नै पहिलो पटक अस्पतालले सिटी स्क्यान मेशिन जडान गरेको जनाएको छ । अस्पतालले सुरुमा विशेषज्ञ चिकित्सकहरू सहित फिजिसियन, हाडजोर्नी, बालरोग, स्त्री, सर्जन, रेडियोलोजिष्ट र एनेथेसियोलोजिष्ट सेवा दिने अस्पतालका प्रबन्ध निर्देशक पुष्पराज धितालले जानकारी दिए ।
उनकाअनुसार अस्पताल आउने बिरामीले नाक, कान, घाँटी छाला रोग र नशा तथा मानसिक रोगका चिकित्सक सेवा समेत पाउनेछन् ।
