राष्ट्रियसभामा नेकपाका १६ र राजपाका २ निर्वाचित

मर्दी न्युज
माघ ९ गते २०७६ मा प्रकाशित

पोखरा, ९ माघ । संसदको माथिल्लो सदन राष्ट्रिय सभाको १८ सिटका लागि भएको चुनावमा सत्तारूढ नेकपाले १६ सिट हात पारेको छ । नेकपाकै समर्थनमा राष्ट्रिय जनता पार्टीले दुई सिट जितेको छ । प्रदेश २ मा नेकपाले राष्ट्रिय जनता पार्टी राजपासँग तालमेल गरी २÷२ सिट बाँडफाँट गरेको थियो । र, नतिजा पनि सोही अनुसार आएको छ ।

विपक्षी नेपाली कांगे्रसले पूर्वानुमान अनुसार नै एक सीट पनि जितेन । विहीबारको निर्वाचनपछि राष्ट्रियसभामा रहेका कांग्रेसका ७ जना सांसदको सीट घटेको छ । राष्ट्रिय सभामा प्रतिपक्षी कांग्रेसको १३ सीटबाट ६ सीटमा खुम्चिएको छ ।

५९ सदस्यीय राष्ट्रिय सभामा सरकारले मनोनित गर्ने तीन जनाबाहेक ४७ जना नेकपा सांसद भएका छन् । थोरै संख्याको कमीले प्रतिनिधिसभामा दुई तिहाइ पुग्न चुकेको सत्तारूढ दल नेकपाले माथिल्लो सदन राष्ट्रिय सभामा भने दुई तिहाइभन्दा पनि बढी संख्या बनाएको छ । विपक्षी दलको ७ सीट घटेसँगै सत्तारुढ दलको संख्या बढेको हो ।

नयाँ निर्वाचितले फागुन २१ देखि मात्र जिम्मेवारी पाउनेछन् ।

राष्ट्रियसभामा प्रदेश एकबाट ३ जना, प्रदेश दुईमा ४, बागमतीमा २, गण्डकी प्रदेशमा २, प्रदेश पाँचमा ३, कर्णालीमा २ र सुदूरपश्चिम प्रदेशमा २ जनाका लागि आज बिहीबार मतदान भएको थियो ।