काठमाडौँ । त्रिभुवन विश्वविद्यालय परीक्षा नियन्त्रण कार्यालयले चारवर्षे स्नातक तहका विभिन्न शैक्षिक कार्यक्रमको ट्रान्सक्रिप्ट प्राप्त गर्न अबदेखि अनलाइन आवेदन प्रणाली लागू गर्ने भएको छ।
कार्यालयले जारी गरेको सूचनाअनुसार स्नातक तहअन्तर्गत बीए, बीएड, बीएस्सी र बीबीएस कार्यक्रमका विद्यार्थीले ट्रान्सक्रिप्टका लागि विद्युतीय माध्यमबाट मात्र निवेदन दिनुपर्ने व्यवस्था गरिएको हो।
नयाँ व्यवस्थाअनुसार २०८३ साउन १ गतेदेखि ट्रान्सक्रिप्टका लागि प्रत्यक्ष उपस्थित भई कागजी आवेदन बुझाउने प्रक्रिया बन्द गरिनेछ। त्यसपछि सम्बन्धित सेवाका लागि कार्यालयले भौतिक आवेदन स्वीकार नगर्ने जनाएको छ।
परीक्षा नियन्त्रण कार्यालयले सेवा प्रवाहलाई थप व्यवस्थित, छरितो र प्रविधिमैत्री बनाउने उद्देश्यले उक्त व्यवस्था कार्यान्वयनमा ल्याउन लागेको उल्लेख गर्दै सम्बन्धित विद्यार्थीलाई अनिवार्य रूपमा अनलाइन प्रणालीमार्फत आवेदन दिन आग्रह गरेको छ।
