काठमाडौँ। पाकिस्तानस्थित ब्रोड पिक हिमाल आरोहणका क्रममा ज्यान गुमाएका पर्वतारोही पुरबहादुर गुरुङ (युक्त) को शुक्रबार काठमाडौँमा अन्त्येष्टि गरिएको छ।
गुरुङको पार्थिव शरीर नेपाल ल्याइएपछि स्वयम्भूमा धार्मिक परम्पराअनुसार अन्तिम संस्कार गरिएको हो। अन्त्येष्टिअघि स्वयम्भूमै उनको पार्थिव शरीरमा श्रद्धाञ्जली अर्पण गरिएको थियो।
श्रद्धाञ्जली कार्यक्रममा गृहमन्त्री सुधन गुरुङ, पूर्वउपसभामुख इन्दिरा रानामगर तथा नेपाल पर्वतारोहण संघका पदाधिकारीलगायत सहभागी भएका थिए। सो अवसरमा गृहमन्त्री गुरुङले राष्ट्रिय झन्डा ओढाएर पर्वतारोही गुरुङप्रति सम्मान व्यक्त गरेका थिए।
ब्रोड पिकमा आएको हिम पहिरोमा परी गुरुङसहित निर्मल पुर्जा लगायत ६ नेपाली पर्वतारोही र अन्य गरी १० जनाले ज्यान गुमाएका थिए। घटनामा ज्यान गुमाएका गुरुङको शव बिहीबार नेपाल ल्याइएको थियो।
गोरखाको लाप्राकका गुरुङ नेपाली पर्वतारोहण क्षेत्रमा अनुभवी आरोहीका रूपमा परिचित थिए। उनले सगरमाथाको १० पटक सफल आरोहण गर्नुका साथै ८ हजार मिटरभन्दा अग्ला हिमालहरू २८ पटक सफलतापूर्वक आरोहण गरिसकेका थिए।
पर्वतारोहण क्षेत्रमा लामो अनुभव र उच्च हिमाली क्षेत्रमा हासिल गरेको सफलताका बाबजुद ब्रोड पिकको आरोहणका क्रममा भएको हिम पहिरोमा परी उनको निधन भएको हो।
