काठमाडौँ। मार्चमा नेपालमा १ लाख २० हजार ५ सय १६ विदेशी पर्यटकले भ्रमण गरेका छन्।
नेपाल पर्यटन बोर्डले जारी गरेको तथ्यांक अनुसार मार्च महिनामा दक्षिण एसियाली र अन्य एसियाली मुलुकबाट आउने पर्यटकको संख्या उल्लेख्य रूपमा बढेको देखिएको छ।
विशेष रूपमा, दक्षिण एसियाली (सार्क) मुलुकबाट मात्रै ४२ हजार ६ सय ६८ पर्यटक नेपाल आएका छन्, जुन कुल आगमनको करिब ३५.४ प्रतिशत हो। यसमा भारतबाट २५ हजार ७ सय २८, श्रीलंकाबाट १० हजार ७ सय ५९ र बंगलादेशबाट ४ हजार ६ सय ७६ पर्यटकले भ्रमण गरेका छन्। भारत सबैभन्दा बढी पर्यटक पठाउने मुलुकको सूचीमा पहिलो स्थानमा रहेको छ।
त्यस्तै, चीनबाट ११ हजार २ सय २०, म्यानमारबाट ६ हजार २० र थाइल्यान्डबाट ३ हजार ८ सय ९७ पर्यटक नेपाल आएका छन्। जापान, मलेसिया र दक्षिण कोरियाबाट समेत उल्लेखनीय संख्या आएको बोर्डले जनाएको छ।
समग्रमा अन्य एसियाली मुलुकबाट ३३ हजार ४ सय ३६ पर्यटक नेपाल आएका छन्, जुन कुल आगमनको करिब २७.७ प्रतिशत हो।
