रसुवाको भोटेकोशीमा १० भदौमा आएको विनाशकारी बाढीका कारण त्रिशूली-३ ‘ए’ जलविद्युत आयोजनाको सुरुङभित्र फसेका दुई जनाको जीवितै उद्धार भएको छ ।
सुरुङभित्र फसेकाे अवस्थामा रहेका सञ्जय साह र कबीर महर्जनको नेपाली सेनासहितको प्राविधिक टोलीले सकुशल उद्धार गरेको हो।
आयोजनास्थलमा खोजी तथा उद्धारमा निरन्तर खटिएको सुरक्षाकर्मी र प्राविधिक टोलीले बिहान सुरुङभित्रबाट मानिसको आवाज सुनिएको संकेत पाएका थिए। इन्जिनियर श्रीराम न्यौपानेका अनुसार आवाजको संकेत मिल्ने बित्तिकै नेपाली सेनाको टोलीले उद्धार कार्यलाई तीव्र पारेको थियो।
उद्धार टोलीकाे अथक प्रयासपछि सुरुमा सञ्जय साह र त्यसको केही समयपछि अर्का व्यक्ति कबीर महर्जनलाई पनि जीवितै बाहिर निकालिएकाे छ। बाढीकाे गएकाे १०दिन पछि सुरुङबाट जीवितै उद्धार गरिएका दुवै जनालाई तत्काल आवश्यक स्वास्थ्य परीक्षण र उपचारका लागि पठाइएको छ। आयोजना क्षेत्रमा उद्धार टोलीले अझै पनि खोजी कार्य जारी राखेको छ।
