पोखरा । कोरोना भाइरसका संक्रमणबाट गएराति पोखरामा मृत्यु भएका ५५ वर्षीय व्यक्ति स्याङ्जाको सिरुबारीमै किराना पसल गर्ने गरेको पाइएको छ । स्याङ्जाका प्रमुख जिल्ला अधिकारी गंगाबहादुर क्षेत्रीले दिएको जानकारीअनुसार मृतकको कुनै ‘ट्राभल हिस्ट्री‘ देखिँदैन ।
मृतकको घर अर्जुनचौपारी भएको र व्यवसाय आँधिखोला गाउँपालिका वडा नं. १ स्थित पञ्चमुलमा रहेको प्रमुख जिल्ला अधिकारी क्षेत्रीले बताए ।
‘उहाँलाई ज्वरो आएपछि पोखरा जानुभएको रहेछ । त्यहाँ चेक गर्दा कोरोना देखियो । बाहिर गएर आएको होइन, को कोसँग भेट भयो थाहा हुन सकेको छैन’ प्रमुख जिल्ला अधिकारी क्षेत्रीले भने ।
इमर्जेन्सी बाहेकका सेवा आज बन्द
गएराती स्याङ्जाका ५५ वर्षीय पुरुषको मृत्यु भएसँगै पोखरा पश्चिमाञ्चल क्षेत्रीय अस्पतालको इमर्जेन्सी बाहेकका सबै सेवा बन्द भएको छ । कोरोना संक्रमणका कारण स्याङ्जाका ५५ वर्षे पुरुषको शव व्यवस्थापन गर्नुपर्ने भएकाले बिहीबार सेवा बन्द गरिएको अस्पतालका निर्देशक डा. अर्जुन आचार्यले जानकारी दिए ।
शुक्रबारबाट सबै सेवा नियमित सञ्चालन हुने पनि उनले बताए । उपचारका लागि गत ८ जेठमा पोखरा आएका स्याङ्जाको आँधीखोला गाउँपालिकाका पुरुषको गएराती मृत्यु भएको हो ।
डाइबेटिज र निमोनियाबाट ग्रस्त ती पुरुषलाई श्वासप्रश्वासमा समस्या भएपछि पोखरा ल्याएर भेन्टिलेटरमा राखिएको थियो ।
