नेपाल लिट्रेचर फेस्टिभल ३ फागुनदेखि पोखरामा हुने

-


     मर्दी न्युज    
     माघ २४ गते २०८० मा प्रकाशित


पोखरा । नेपाल लिट्रेचर फेस्टिभल फागुन पहिलो साता पोखरामा हुने भएको छ । बुकवर्म फाउन्डेसनको आयोजना तथा पोखरा महानगरपालिकाको प्रवद्र्धनमा हुने नेपाल लिट्रेचर फेष्टिभलको एघारौं संस्करण आगामी फागुन ३ गतेदेखि ७ गतेसम्म पोखराको लेकसाइडस्थित बाराहीघाटमा हुने बिहीबार पोखरामा आयोजित पत्रकार सम्मेलनमार्फत जानकारी दिइएको हो ।

यसवर्षको फेस्टिभलको प्रवद्र्धकमा पोखरा महानगरपालिका रहेको आयोजक संस्था बुकवर्म फाउण्डेसनले जनाएको छ ।

लिट्रेचर फेष्टिभलमा देशविदेशका गरेर दुई सय भन्दा बढी साहित्यकार, राजनीतिज्ञ, लेखक, पत्रकार, कलाकार, सम्पादक एवम् विशिष्ट व्यक्तित्वको उपस्थिति रहने आयोजक संस्थाका केशवशरण लामिछानेले जानकारी दिए । फेस्टिभलमा ५५ भन्दा बढी सेसन, साङ्गीतिक साँझ र थप रोचक सामग्री समावेश हुने उनको भनाई छ ।

लिट्रेचर फेष्टिभलको प्रमुख आकर्षणका रुपमा विश्वप्रसिद्ध ‘पुलिट्जर प्राइज’ विजेता पुस्तक ‘अमेरिकन प्रोमिथियसः द ट्रायम्फ एन्ड ट्रयाजिडी अफ जे रबर्ट ओपनहाइमर’का सहलेखक काई बर्ड सहभागी हुँदैछन् । उनको यस पुस्तकमा आधारित ओपनहाइमर चलचित्र सन २०२३ मा बक्स अफिसमा ब्लकबस्टर बनेको थियो ।

त्यसबाहेक फेष्टिभलमा ‘एभ्रिथिङ द लाइट टचेज’ पुस्तकका प्रसिद्ध भारतीय लेखिका ज्यानिस प्यारियट, ‘क्लाउड्स र अर्जी द ड्वार्फ’ पुस्तकका विश्वप्रसिद्ध समालोचक एवम् उपन्यासकार चन्द्रहास चौधरीलगायतका चर्चित विदेशी लेखक, लेखिकाहरुपनि सहभागि हुने आयोजकले जानकारी दिए ।

यस वर्षको फेष्टिभलमा पूर्वप्रधानन्यायाधीश कल्याण श्रेष्ठले ‘संविधान र सुशासन’ विषयमा विद्वत् प्रवचन दिने आयोजकले जनाएका छन् । यस्तै पत्रकार विजय कुमार, सांसद एवम् अर्थशास्त्री डा. स्वर्णिम वाग्ले, संस्कृति, पर्यटन तथा नागरिक उड्डयनमन्त्री सुदन किराँती, सांसद सुमना श्रेष्ठ, पूर्वमिस नेपाल श्रृङ्खला खतिवडालगायतले विचारको मन्थन गर्नेछन् ।

यसैगरी फेष्टिभलमा नेपालको अर्थतन्त्रका समस्या र समाधानबारे वर्तमान तथा पूर्व अर्थमन्त्रीहरुसँग बहस हुने भएको छ । जसमा अर्थमन्त्री डा. प्रकाशशरण महत, पूर्वअर्थमन्त्रीहरू वर्षमान पुन, सुरेन्द्र पाण्डेलगायत सहभागि हुने आयोजकको भनाई छ ।

यसैगरी नेपालको राजनीति र अबको बाटोबारे डा. सिके राउत, लेखक खगेन्द्र संग्रौला, प्रा.डा. कुन्दन अर्याल, पत्रकार भूषण दाहाल, गण्डकी प्रदेशका पूर्वमुख्यमन्त्री पृथ्वीसुब्बा गुरुङ, मुख्यमन्त्री सुरेन्द्रराज पाण्डेले सहभागिता जनाउने छन् । यस्तै फेष्टिभलमा सांसद एवम् उद्योगी विनोद चौधरी, नेपाल विद्युत् प्राधिकरणका कार्यकारी निर्देशक कुलमान घिसिङ, योगी विकासानन्द, पूर्वपरराष्ट्रमन्त्री विमला राई पौड्याल, रोहिणी राणा, राष्ट्रिय योजना आयोगका पूर्वउपाध्यक्ष विश्व पौडेल, पूर्वबैङ्कर अनिलकेशरी शाह, प्रा।कुसुम शाक्य, नेत्री समीक्षा बास्कोटालगायतपनि वक्ताका रुपमा सहभागी हुने निर्देशक भारीले बताए ।

यसैगरी फेष्टिभलमा गायक बद्री पङ्गेनी, गजलकार एवम् लेखक शीतल कादम्बिनी, कवि डा. नवराज लम्साल, लेखक अमर न्यौपाने, लेखक कुमार नगरकोटी, गजलकार सङ्गीता थापा, गजलकार सुमन स्मारिकालगायतको सहभागिता रहने आयोजकले जनाएको छ ।

फेष्टिभलमा हरेक दिन पूर्वाह्न १० बजेदेखि साँझ ७ बजेसम्म सञ्चालन हुनेछन् भने हरेक दिन साङ्गीतिक प्रस्तुति पनि हुनेछन् । निर्देशक निरज भारीका अनुसार फेस्टिभलमा कुटुम्ब ब्यान्ड, डा. ध्रुवेशचन्द्र रेग्मी र उनको समूह, डा. सुमन थापा र द ब्लू फ्रेट ब्यान्ड, विपुल क्षेत्री र उनको द ट्राभलिङ ब्यान्डलगायतको प्रस्तुती रहनेछन् । सो अवसरमा लेखक कुमार नगरकोटीले कुटुम्ब ब्यान्डसँग रिसाइटेसनसमेत गर्ने आयोजकले जनाएको छ ।

फेस्टिभलको गण्डकी प्रदेशका मुख्यमन्त्री सुरेन्द्रराज पाण्डेले उद्घाटन गर्नेछ । सो दिन वरिष्ठ कार्टुनिष्ट दुर्गा बराल वात्स्यायनको कार्टुन प्रदर्शनी गरिने केशवशरण लामिछानेले जानकारी दिए । ‘जहाँ शब्दहरू जीवन्त हुन्छन्’ भन्ने मूल नाराका साथ शुरु भएको नेपाल लिट्रेचर फेस्टिभलले कला, साहित्यको प्रवद्र्धन गर्नुका साथै विचार निर्माण र समाजको आलोचनात्मक चेतलाई समेत उचाइ दिने काम गरिरहेको उनले बताए । ‘त्यसैले यो लिट्रेचर फेस्टिभल पोखरेली र समग्र साहित्य अनुरागीका लागि बहुप्रतिक्षित बनेको छ’–उनले भने । यो ब्राण्डका रुपमा स्थापित भइसकेको उनको भनाई छ । उनले हिमाल, ताल र सौन्दर्यको सहर पोखरालाई साहित्यको सहर पनि बनाउन फेस्टिभलले सघाइरहेको दाबी गरे ।