अमेरिका र इरानबीच पछिल्ला दिनहरूमा भएको कूटनीतिक संवाद सकारात्मक दिशामा अघि बढेको संकेत देखिएको छ। अमेरिकी राष्ट्रपति डोनाल्ड ट्रम्पले वार्ताबाट उपलब्धि हासिल भएको जनाउँदै इरान लक्षित सैन्य गतिविधि अस्थायी रूपमा रोक्ने निर्णय सार्वजनिक गरेका छन्।
राष्ट्रपति ट्रम्पले सामाजिक सञ्जालमार्फत दुई देशबीचको छलफल फलदायी भएको उल्लेख गर्दै मध्यपूर्व क्षेत्रका तनाव न्यूनीकरणतर्फ प्रगति भएको बताएका छन्। उनका अनुसार इरानको ऊर्जा पूर्वाधारलाई लक्षित गर्दै हुने अमेरिकी आक्रमणहरू पाँच दिनका लागि स्थगन गरिनेछ।
‘म यो जानकारी दिन पाउँदा खुशी छु कि सयुक्त राज्य अमेरीका र इरानबीच पछिल्ला दुई दिनमा मध्यपूर्वमा रहेका आपसी शत्रुताको पूर्ण र अन्तिम समाधानका विषयमा अत्यन्त सकारात्मक र फलदायी वार्ताहरू भएका छन्।
जुन यस हप्ताभरि जारी रहनेछन्—मैले युद्ध विभागलाई इरानी विद्युत् उत्पादन केन्द्रहरू र ऊर्जा पूर्वाधारमाथि गरिने सबै प्रकारका सैन्य आक्रमणहरू पाँच दिनका लागि स्थगित गर्न निर्देशन दिएको छु।’ ट्रम्पले सामाजिक संजालमा भनेका छन् ।
यसअघि इरानतर्फबाट पनि कडा चेतावनी जारी गरिएको थियो। इरानको राष्ट्रिय रक्षा परिषद्ले आफ्ना तटीय क्षेत्र वा टापुहरूमा कुनै आक्रमण भए फारसको खाडी क्षेत्रका समुद्री मार्गहरूमा विस्फोटक सामग्री प्रयोग गरिने चेतावनी दिएको थियो।
यता, होर्मुज जलडमरूमध्य पुनः सञ्चालन गर्ने विषयमा अमेरिकाले इरानलाई दिएको समयसीमा समेत समाप्त हुन लागेको सन्दर्भमा दुवै पक्षबीचको संवादलाई तनाव घटाउने प्रयासका रूपमा हेरिएको छ।
अन्तर्राष्ट्रिय समुदायले हालको कूटनीतिक पहललाई क्षेत्रीय स्थायित्वका लागि सकारात्मक संकेतका रूपमा विश्लेषण गरिरहेको छ।
