काठमाडौँ । नदीकिनार तथा सार्वजनिक जग्गामा बसोबास गर्दै आएका परिवारहरूको वर्तमान अवस्था मूल्यांकन गर्न राष्ट्रिय मानव अधिकार आयोगले अनुगमन टोली परिचालन गरेको छ ।
आयोगका प्रतिनिधिहरू आइतबार बिहान कीर्तिपुरस्थित राधा स्वामी सत्संग व्यास परिसरमा पुगेर त्यहाँ राखिएका विस्थापित परिवारहरूको अवस्था बुझ्न थालेका हुन् ।
काठमाडौँका थापाथली र गैह्रीधारा क्षेत्रबाट शनिबार हटाइएका व्यक्तिहरूलाई नेपाल प्रहरी तथा नगर प्रहरीले नागार्जुन, कीर्तिपुरस्थित सत्संग भवनलगायत विभिन्न स्थानमा अस्थायी रूपमा राखेको जनाइएको छ ।
उक्त प्रक्रिया कार्यान्वयनका क्रममा मानव अधिकार उल्लङ्घन हुन सक्ने सार्वजनिक चासो र आरोपहरू उठेपछि आयोगले प्रत्यक्ष अनुगमनका लागि टोली पठाएको जनाएको छ । टोलीले बसोबास, सुरक्षा, स्वास्थ्य तथा आधारभूत आवश्यकताको अवस्थाबारे जानकारी संकलन गरिरहेको बताइएको छ ।
आयोगले यसअघि पनि सुकुम्वासी व्यवस्थापनका विषयमा सरकारलाई पुराना सिफारिस कार्यान्वयन गर्न आग्रह गरेको थियो । वैशाख ११ गते पठाइएको पत्रमार्फत आयोगले २०६९ सालमा दिइएका सुझावहरू कार्यान्वयन गर्न स्मरण गराएको थियो ।
उक्त सिफारिसमा वास्तविक सुकुम्वासीको पहिचान गरी उपयुक्त वैकल्पिक आवासको व्यवस्था सुनिश्चित गरेपछि मात्र व्यवस्थापन प्रक्रिया अघि बढाउनुपर्ने उल्लेख छ । साथै, अतिक्रमित भूमि खाली गराउने क्रममा अत्यधिक बल प्रयोग नगरी संयमता अपनाउन पनि सरकारलाई सचेत गराइएको थियो ।
