काठमाडौँ । सरकारले भन्सार महसुलको विद्यमान तहगत संरचनामा पुनर्संरचना गर्दै दर प्रणालीलाई सरलीकृत गरेको छ । आगामी आर्थिक वर्ष २०८३-८४ को बजेटमार्फत भन्सार दरलाई ११ तहबाट घटाएर ७ तहमा सीमित गरिएको हो ।
अर्थमन्त्री डा. स्वर्णिम वाग्लेले बजेट प्रस्तुत गर्दै औद्योगिक उत्पादनका लागि आवश्यक कच्चा पदार्थमा लाग्दै आएको भन्सार महसुल दर पनि एक तहले घटाइएको जानकारी दिए ।
उनका अनुसार विभिन्न शीर्षकअन्तर्गत पर्ने कुल २७३ वस्तुमा भन्सार दर घटाउने व्यवस्था गरिएको छ, जसले उत्पादन लागत घटाउने अपेक्षा गरिएको छ ।
यसैगरी, ३६० प्रकारका वस्तुमा लाग्दै आएको अन्त:शुल्क पूर्ण रूपमा हटाइएको छ । सरकारले कर प्रणालीलाई सरल र एकीकृत बनाउने उद्देश्यसहित यस्तो निर्णय गरेको हो ।
बजेटमा भन्सार विन्दुमा संकलन हुँदै आएका विभिन्न छरछरिएका कर तथा शुल्कलाई समेटेर एकीकृत ‘हरित कर’ प्रणाली लागू गर्ने व्यवस्था समेत गरिएको अर्थमन्त्री वाग्लेले बताए ।
