पोखरा, १२ वैशाख । कोरोना भाइरस संक्रमितको संख्या २७ लाख नाघेको छ । शुक्रवार बिहानसम्म विश्वभर कोरोना संक्रमितको संख्या २७ लाख १७ हजार ९२१ पुगेको छ ।
विश्वभर कोरोना संक्रमणबाट ज्यान गुमाउनेको संख्या १ लाख ९० हजार ४९९ पुगेको छ ।
सबैभन्दा धेरै अमेरिकामा ८ लाख ८० हजार २०४ जना कोरोना भाइरसबाट संक्रमित हुन पुगेका छन् भने अमेरिकामा कोरोनाबाट ज्यान गुमाउनेको संख्या ४९ हजार ८४५ पुगेको छ ।
त्यस्तै अमेरिका पछि धेरै संक्रमित स्पेनमा २ लाख १३ हजार २४ जनामा भेटिएको छ । स्पेनमा संक्रमणबाट ज्यान गुमाउनेको संख्या २२ हजार १५७ पुगेको छ ।
इटलीमा १ लाख ८९ हजार ९७३, फ्रान्समा १ लाख ५८ हजार १८३, जर्मनीमा १ लाख ५३ हजार १२९ र बेलायतमा १ लाख ३८ हजार १७८ जनामा संक्रमित भएको छ ।
यसैगरी टर्कीमा पनि संक्रमितको संख्या एक लाख नाघेको छ । टर्कीमा हालसम्म १ लाख १ हजार ७९० जनामा संक्रमितको पुष्टि भएको छ ।
संक्रमणबाट इटलीमा ज्यान गुमाउनेको संख्या २५ हजार ५४९ जना पुगेको छ । त्यस्तै फ्रान्समा २१ हजार ८५६, जर्मनीमा ५ हजार ५७५, बेलायतमा १८ हजार ७३८ जनाले कोरोना संक्रमणबाट ज्यान गुमाएको छ ।
विश्वभर कोरोनाका ५८ हजार ६९० जनाको गम्भीर अवस्थामा उपचार भइरहेको छ । १७ लाख ८१ हजार ८११ जनाको अवस्था सामान्य रहेको छ । ७ लाख ४५ हजार ४८० जना निको भएर घर फर्किसकेका छन् ।
नेपालमा भने कोरोना संक्रमणका कारण आजसम्म कसैले पनि ज्यान गुमाउनु परेको छैन । बिहीबार मात्र देशमा थप ३ जनामा कोरोना संक्रमित भेटिएपछि हालसम्म संक्रमितको संख्या ४८ जनामा पुष्टि भएको छ भने १० जना निको भएर घर फर्किसकेका छन् । उपचाररतको अवस्था सामान्य रहेको स्वास्थ्य मन्त्रालयले जनाएको छ ।
