स्वास्थ्य तथा जनसंख्या मन्त्रालयले सरकारी अस्पतालको ओपीडी सेवा शनिवार र आइतबार दुवै दिन बन्द गर्ने निर्णयलाई निरन्तरता दिने भएको छ ।
यसअघि मन्त्रालयले अस्पतालमा २ दिन बिदा दिँदा बिरामी मर्कामा पर्ने भन्दै अस्पतालहरुलाई आइतबार पनि ओपीडी खुला गर्न आग्रह गरेकाे थियाे ।
मन्त्रालयको आग्रहपछि पनि अन्य क्षेत्रमा विदा दिएर आइतबार ओपिडी सेवा संचालन गर्दा अस्पतामा विरामीको चाप बढी हुने भन्दै चिकित्सक संघले आइतबार ओपीडी खाेल्न नसक्ने स्पष्ट पारेको थियो ।
चिकित्सकहरुले सरकारले आइतबार खोल्न निर्देशन दिएपनि त्यसलाई अवज्ञा गर्दै आएका थिए । चिकित्सकले विरोध जारी राखेपछि सरकारी अस्पतालहरुमा फेरि आइतबार बिदा कायम गरेकाे हाे ।
मन्त्रालयले आज एक विज्ञप्ति जारी गर्दै हप्तामा शनिबार र आइतबार दुई दिन सार्वजनिक बिदा दिने निर्णय कार्यान्वयनसँगै स्वास्थ्य सेवामा कुनै अवरोध नहुने उल्लेख गरेको छ।
मन्त्रालयले अस्पतालहरूमा बिरामीको निरन्तर हेरचाह सुनिश्चित गर्न २४ सै घण्टा आकस्मिक तथा अन्तरंग सेवा यथावत सञ्चालन रहने जनाएको छ।
