पोखरा, १५ चैत । बागलुङमा पनि कोरोना भाइरस (कोभिड–१९) संक्रमित फेला परेको छ । बेल्जियमबाट नेपाल आएकी बागलुङकी एक २२ वर्षीया युवतीमा कोरोना भाइरस संक्रमण पुष्टि भएको हो । यससँगै नेपालमा कोरोना संक्रमितको संख्या पाँच पुगेको छ ।
पाँच संक्रमितमध्ये एक निको भएर घर फर्किसकेका छन् । दुई जनाको टेकुस्थित शुक्रराज ट्रपिकल तथा सरुवा रोग अस्पताल र एकको सेती प्रादेशिक अस्पतालमा उपचार भइरहेको छ ।
अहिले संक्रमण देखिएकी बागलुङकी युवती चैत ४ गते नै कतार एयरवेजको ‘क्यूआर ६५२’ विमानबाट नेपाल आएकी थिइन् ।
हालसम्म ८७५ वटा टेस्ट भएको र ३२ वटा परीक्षणका क्रममा रहेको मन्त्रालयले जनाएको छ । टेकु अस्पतालमा १० जना आइसोलेसनमा रहेको स्रोतले बताएको छ ।
