पृथ्वी राजमार्गअन्तर्गत कृष्णभीरमा त्रिशूली बाढीका कारण अवरुद्ध सडक खुलाउन नयाँ ट्रयाक निर्माणको काम तिब्र पारिएको छ ।
सडक सञ्चालनमा ल्याउन निर्माण व्यवसायी, सडक विभागका प्राविधिक तथा सुरक्षाकर्मीसहितको टोलीले रातदिन काम गरिरहेको हो । निर्माण व्यवसायी महासंघका उपाध्यक्ष तथा शगुन कन्स्ट्रक्सनका सञ्चालक शहदेव खड्काकाअनुसार नयाँ ट्रयाक खोल्ने काम शुरु भएको १० दिन पुगेको छ । अहिले ब्याक कटिङ र ग्रेड कटिङको काम अन्तिम चरणमा पुगेको उनले जानकारी दिए । भदौ १४ गते कृष्णभीरमा गएको पहिरोका कारण पृथ्वी राजमार्ग अवरुद्ध भएपछि माथिल्लो भागबाट नयाँ ट्रयाक खोल्ने काम अघि बढाइएको हो । ग्रेड कटिङ पूरा भएपछि सबग्रेड र सब–बेस निर्माण गरी ग्राभेलिङ गर्ने तयारी भइरहेको खड्काले बताए । खड्काकाअनुसार अबको केही दिनभित्र नयाँ ट्रयाकबाट दुईतर्फी यातायात सञ्चालन गर्ने लक्ष्य राखिएको छ ।
नयाँ सडकबाट ग्यास बुलेट, लरी, ठूला ट्रक तथा अन्य हेभी सवारीसाधनसमेत सहज रूपमा सञ्चालन गर्न मिल्ने गरी निर्माण भइरहेको उनको भनाइ छ । ‘काठमाडौँको लाइफलाइन’ का रूपमा रहेको पृथ्वी राजमार्गमा यातायात सहज बनाउन रातको समयमा समेत निर्माण कार्यलाई निरन्तरता दिइएको खड्काले बताए । निर्माण कम्पनीसँगै सडक विभाग, कन्सल्टेन्ट, प्राविधिक तथा अपरेटर र सुरक्षाकर्मीको टोली रातदिन निर्माण स्थलमा खटिएको उनले जानकारी दिए ।
खड्काकाअनुसार नयाँ ट्रयाकको ग्रेड कटिङ अन्तिम चरणमा पुगेकाले अब सबग्रेड र सब–बेसको काम पूरा गरेपछि यातायात सञ्चालन गर्न सकिनेछ । कृष्णभीरमा सडक खुलाउन शगुन कन्स्ट्रक्सनको टोलीले निर्माण कार्य गरिरहेको छ । सडक अवरुद्ध हुँदा काठमाडौँतर्फको यातायात तथा अत्यावश्यक सामग्रीको आपूर्तिमा परेको असरलाई कम गर्न निर्माण कार्यलाई तीव्र पारिएको निर्माण पक्षले जनाएको छ ।
